Hoxe temos unha receita ben sinxela para os que queredes comezar a facer pan pero non vos atrevedes aínda a facer lévedo, roscas, bolas, etc (os que estades coma min, resumindo).
A foccacia é un pan típico da rexión italiana de Liguria, e comíase a todas horas porque era o que había e porque está moi rica. Esta receita é a da “normal”, pero podedes engadir ourego, romeu, tomiño, etc. Aguanta un día sen poñerse resesa, pero o ideal é comela aínda quentiña do forno. Para que vos fagades unha idea do tamaño, o molde ten 25 cm de diámetro. Pode facerse en moldes de metal desmontables (cun papel debaixo) ou nos de cristal.
Ingredientes (dá para 4 bocadillos grandes)
Medio quilo de fariña de forza
400 ml de auga morna
15 gr de lévedo fresco
Dúas culleriñas de sal gordo
Dúas culleres de aceite de oliva virxe, máis un chisco para o molde.
- Disolvemos o lévedo na auga, remexendo ben
- Mesturamos nun bol a fariña de forza e o sal, facemos un oco no medio e botamos a mestura do paso anterior. Remexemos aos poucos cunha culler de pau.
- Tapamos cun film transparente e deixamos repousar 18-24 horas na neveira.
- Sacarmos o bol e quitamos o gas da fermentación facendo unha bola. Engraxamos o molde e colocamos a bola, tapando co film, para que repouse 4 horas máis, desta vez a temperatura ambiente.
- Quecemos o forno a 225º
- Estendemos a bola de masa cas maus ata repartila uniformemente no molde.
- Botamos as dúas culleres aceite por riba, afundimos os dedos índice e maior facendo ocos de xeito uniforme por toda a masa.A idea é que quede coma un miolo.
- Botamos as escamas de sal. Se queredes usar sal normal, un bo truco é disolvela nun chisco de auga e estender pola masa.
- Metemos a masa no forno axiña, porque se a deixades 15 minutos fóra como fixen eu os ocos comezan a desfacerse.
- Cocemos durante 20-25 minutos
Que aproveite!
