Xarrete guisado

O xarrete é a parte de enriba da pata traseira da vaca, para guisalo é importante que sexa de boa calidade, así que preguntadelle primero ó voso carniceiro de confianza. Fai un guiso riquísimo e ben sinxelo, seica típico da zona de Compostela.

Ingredientes (para 4 persoas, 3 se sodes uns comellóns):

1 quilo de xarrete – aproximadamente dúas pezas

2 cebolas pequenas

200 gramos de chícharos

10-12 patacas pequenas

4 cenorias

3 follas de loureiro seco

2 dentes de allo

2 pastillas de Avecrem

5 culleradas de aceite

Sal e pementa

 

  1. Cortamos os xarretes en tacos, non moi pequenos porque ao cocer minguan. De dous xarretes deben quedar oito pezas. Botamos sal por riba e cortamos os allos en láminas finas, o máis que se poida, e pegámolas á carne. Deixamos reposar.
  2. Quentamos o aceite e cortamos a cebola en láminas de 2 ou 3 milímetros de grosor. A lume baixo, facemos a cebola ata que estea entre dourada e marrón. A min levoume 20 minutos, pero depende da intensidade do lume. Retiramos a cebola e deixamos o aceite na pota.
  3. Botamos a carne no aceite, ata que se doure ben polos lados. Derretimos as pastillas de Avecrem en auga morna (dous vasos de 200 ml serán de abondo) e botamos o caldo na pota.
  4. Pelamos as patacas e cortámolas en anacos pequenos. Para que e quede o guiso máis espeso é mellor esgazalas facendo cuña co coitelo que cortalas en cadrados regulares. Despois poñémolas na pota xunto cos chícharos.
  5. Pelamos a cenorias e facemos láminas (moi finiñas!), botámolas ao guiso. Engadimos o loureiro, e sal e pementa ao gusto.
  6. Deixamos que se faga a lume baixo durante unha hora e media.

Preme na imaxe para ve-la máis grande:

xarrete2

Como case tódolos guisos, estará mellor ao día seguinte: demáis de que a carne queda moi suave, sae unha salsa boísima. Se vos pasou coma a min e a carne encolleu moito, podédes usar as sobras do guiso para facer uns ovos escalfados na sartén. Que aproveite!

Deixa unha resposta

O teu enderezo electrónico non se publicará Os campos obrigatorios están marcados con *